第一次整入爐菠蘿包。 用 p 仔打麵糰。 然後跟 youtube 做個菠蘿皮。
不過𠝹得唔係咁靚。 所以啲格仔唔係好明顯。 另外太耐無做麵糰,唔記得先用烏冬 mode,又唔記得加湯種。 好彩成品都 ok。 可能因為個菠蘿皮太好味。
菠蘿皮參考食譜 : youtube ~ 港式菠蘿包做法
麵糰食譜及做法 : 跟機食譜
菠蘿包皮材料:
低筋粉 1/2 杯 + 1 湯匙
奶粉 1 湯平匙
砂糖 5 湯平匙
泡打粉 1/4 茶平匙
梳打粉 1 茶平匙
鹽 1/8 茶匙
牛油 3 安士(約 85G)
蛋黃 1 個
做法:
1)低筋粉、奶粉 、砂糖、泡打粉、梳打粉和鹽拌勻後加入牛油。 用手將牛油和粉類混合至粉粒再加入蛋黃繼續用手揉合至成麵糰。 搓成長條用保鮮紙包好放入雪櫃雪最少 10 分鐘至硬身備用。
麵包麵糰材料 :
高筋麵粉 280G
無鹽牛油 50G
砂糖 25.5G >> 我減到 20G
奶粉 12G
鹽 5G
雞蛋 25G
水 150ML >> 今次都扣了水約用了 130ML。 不過隻粉受水,多了少少要加粉調節
酵母粉 2.8G
麵包麵糰
1)先用 ”14“ 麵糰程式。
2)麵糰程式完了就將麵糰取出。
造型 :
1)將麵糰留在麵包機中進行第一次發酵至麵糰兩倍大小後取出。
2) 用手按扁排氣,然後分割出 12 等份(每個約 45G),滾圓收口朝下,蓋上濕布放入焗爐低層。 按兩下“熱風對流烤焗 (單層)”功能, 然後將溫度設定 40 度, 時間設定 45-60 分鐘 ,按“開始”。 至麵糰發酵至兩倍大小之後取出。
3)從雪櫃取出菠蘿皮麵糰分成十二等份滾圓,再用保鮮紙把麵糰夾上後才用檊麵棍檊薄。 檊薄後即放上麵包麵糰上,用刀在皮面𠝹花再塗上蛋汁。放入已預熱 200 度的焗爐中,焗約 15 分鐘或至表面轉金黃色取出放在鐵架上放涼即成。
沒有留言:
張貼留言