StAuB ~ 소갈비찜 韓式炆牛仔骨 （附食譜及做法）

前兩天在 Taste 買了些急凍牛仔骨， 唔知整咩好。 網上看到人家煮的韓式炆牛肋骨好吸引呢！  所以， 用牛仔骨都照煮.....嘻嘻！

參考食譜 ： 小肥羊 YM blog

我的當然同原著有點分別.....因為原著用牛肋骨， 我用牛仔骨。 原著用貢梨， 我樓下 360 超市竟然一個都冇.....我求其見係梨就買。 咩都有.....係冇貢梨， 無理由因為咁唔買走去奧海城間 Taste 㗎！  怪自己一入去望到以為係梨.....執到成車仔嘢再走埋去先知原來係芒果....激死！

另外原著係用另一款韓式醬.....不過我雪櫃有瓶之前在 taste 買的韓式醬， 只用了少少的， 所以唔好嘥， 用埋佢。

材料
牛仔骨 2 包
白蘿蔔 1 個 （細少少的）
紅蘿蔔 2 個
紅棗 5 粒 （要有核）
粟子 1 包 （超市一 pack pack O個種）
梨 1 個
韓式牛醬 2／3 瓶
薑片 3 ﹣ 4 片
蒜頭 10 粒

做法
1）粟子去殼， 去皮。
2）牛仔骨飛水 （原著要洗淨.....我自己一向習慣牛都係唔洗O既）。 飛水即係滾水放下去， 1 分鐘左右撈起隔水。
3）兩款蘿蔔切球狀， 我都有跟原著....因為原著話韓國人係咁做.....無人知點解。 不過， 唔想花功夫可以切件。
4）梨去皮用攪拌機打成茸。
5）紅棗洗淨
6）煲滾水放入牛仔骨， 薑片， 蒜頭， 紅棗， 梨茸， 韓式醬大火煲滾， 加蓋轉細火炆一小時 （其實用 staub 應該唔使咁耐....不過自已未掌握到時間， 所以跟原著）
7） 一小時後放入粟子及蘿蔔再以大火煮滾後加蓋轉細火炆一小時。
8）炆完後試味， 唔夠鹹可以加少許鹽。 但我試味覺得夠味。 所以沒有再加。

小秘技 ～ 如何快速去粟子皮
燒滾一鍋水， 將去殼的生粟子倒入煮 3 ﹣ 5 分鐘後撈起放入凍水中 3﹣5 分鐘後用刀仔刮起粟皮即可。