自家豉油皇炒麵 “附食譜及做法”

起身見雪櫃有材料， 簡簡單單整個自家炒麵做早餐。

材料
麵餅
銀芽
洋蔥 1/4 個
蔥  按個人喜歡份量

Philips airfryer + 九陽豆漿機 ~ 即磨香滑腰果露 “附食譜及做法”

滑到冇朋友。

只係自己用 airfryer 焗腰果時有點過火了。  可能有少少焦味。 不過我係味覺遲鈍之人， 我就食唔出了。

原食譜用光波爐及高級食品處理器，我改用 airfryer 及 9 仔。

參考食譜 ： 德國寶即磨香滑腰果露

材料
腰果 200G
冰糖 適量
水 900ML

做法
1）先將腰果放入沒有預熱之 airfryer 以 180 度烘 10 分鐘。 其間不斷搖。
2）腰果連冰糖及水放入九陽豆漿機， 再按 “好豆漿”後選擇“干豆”功能即可。

温馨提示
1）我建議烘腰果改用 160 度 10 分鐘或 180 度 5﹣6 分鐘）。 變金黃色即可。
2）成品太杰的話可倒出後加熱水調勻。

其間 9 仔煮到滿頭大汗。

沙茶牛肉炒蜜糖豆

好野味的一個餸。 以前原來肥仔阿媽成日都係用沙茶醬醃牛肉。 我一直沒有注意。  那天雪櫃內找到這瓶物體於是上網找找食用方法才知道可以用來煮牛肉。 所以煮了這個餸。

蜜糖豆先用橄欖油及意大利雜香草拌勻， 置半小時才下鑊炒。 炒時不用加油。 最後加少許糖、鹽調味， 再加少水加蓋略焗後上碟。
牛肉我先用了豉油、糖、紹酒及麻油調味， 下鑊前半小時加沙茶醬拌勻。 炒好加到蜜糖豆上即成。

酸梅麵豉蒸白䱽魚

很久沒有吃白䱽魚。 因為肥仔家較少買。 而且印象中他們都喜歡用豆醬去炆。 但那天肥仔買了這條又大又肥美的， 我即時想起兒時阿媽好鐘意用麵豉蒸， 大概是因為細魔不愛吃魚， 所以阿媽用盡方法去煮務求另到他多吃魚。 但忘了要不要加酸梅， 所以走去問了她。 原來一定要加酸梅先好味。

做法超簡單， 只有將酸梅去核後連同麵豉盅爛後搽上魚身即可下鑊蒸。

用埋汁撈飯仲正！

HeAVy 死嘅牛排配鵝肝餐

之前托朋友在瑞士買了些鵝肝回來， 但遲遲未有機會。 昨天見又有西蘭花， 又有番茄。 仲有粟米粒可以煮個西湯。 所以拿拿淋。

湯用 9 仔煮。

西蘭花用 P 仔蒸烤焗爐。 先將西洗淨後從主莖切出。 泡在鹽水去蟲。 瀝乾後放入烤盤， 加入橄欖油、鹽及胡椒拌勻後鋪上芝士片後放入已預熱至 190 度的焗爐焗 20 分鐘。

牛排用少許雜香草及灑少許海鹽後用 airfryer 180 度 preheat 3 分鐘。 入爐叮 8 分鐘。  上碟淋上黑醋汁 （橄欖油 1 湯匙 ＋ 意大利黑醋 1 湯匙 ＋ 雜香草適量）

番茄開邊後上面灑少許糖再灑上橄欖油拌過的麵包糠。 入焗爐焗 2﹣5分鐘。

鵝肝灑少許鹽， 用少許橄欖油將鵝肝放在鑊邊以慢火煎至兩面金黃色， 七成熟即盛起。 前後約煎 3 分鐘。  上碟配蜂蜜柚子茶醬 （柚子茶醬加少許熱水開稀）。

炒飯是肥仔阿媽早兩天買回來吃剩的。 前天她又問我記唔記得。 真係想殺咗佢。  成日問我記唔記得！

九陽豆漿機 ～ 粟米西蘭花洋蔥濃湯

昨晚弄西餐， 用 9 仔做了這個濃湯。  超簡單。

材料
粟米粒一罐
西蘭花莖一條 ＜＜因為將西蘭花的花去烤， 所以唔想浪費
洋蔥半個
雞湯
淡忌廉
水

做法
1）將西蘭花莖及洋蔥切粒。
2）將粟米粒、西蘭花粒及洋蔥粒放入機內。 加入兩碗雞湯及一碗水。
3）加蓋插上電源， 按“果汁”鍵先將食材打碎。
4）嗶聲響後關掉電源或提起蓋頂放回或開啟電源。
5）按“濃湯”鍵。
6）嗶聲響後開蓋再用果汁功能打一次或加淡忌廉及鹽調味後即可倒出再灑少許乾番西享用。

搶灘成功

最近大魔家裡新添了貓兒最愛的高台。 小虎急不及待要挑戰一番。 對牠來說實在無難度可言。

三個高台， 看來沒有小肥柔的份兒。 因為對她來說太難了。

小武也不甘示弱， 霸返個地頭先。

註 ： 照片由大魔提供

小鬼 ～ 努力嘗試

註 ： by 細魔

努力地將手指仔做 V， 不過同志仍需繼續努力。  最後索性出動頭兩隻手指。

小鬼 ～ 燦爛的笑容 (^o^)

細魔剛發放了一輯小鬼 2011 ﹣ 2013 (apr) 的照片， 從照片上的燦爛笑容也被感染到一種幸福。

希望在他的成長路天天都是開心天。

Panasonic 麵包機 ～ 火腿腸仔芝士手撕麵包

今次沒有按食譜分 12 份， 因為太細小、零零碎碎。 所以同一食譜， 但是只分 4 份。  將腸仔、火腿及芝士包作饀。

法式花藝 LeSSon 11 ～ CoLUmn DesiGn

花材
1）Dragon Willow 龍枊
2）Calla Lilies 馬蹢蘭
3）Penoia 牡丹
4）Eustoma 洋桔梗
5）Persooni 卷竹
6）Clmetis 鐵線蓮

做法
1）先將龍枊剪成均等長度。 由尾開始。 頂部較幼的不要。
2）將剪短的龍柳在泥面隨意插入。 然後用乾草隨意將不同位置的龍柳扎好。

3）將兩支馬蹄蘭各自在外圍的泥上插入， 然後在龍柳枝之間穿插到頂部。
4）插入不知明的小葉遮泥。
5）加入洋桔梗及牡丹。
6）加入鐵線蓮。
7）最後加入卷竹。 將卷竹隨意穿插， 有些自然彈出。

九陽豆漿機 ～ 綠豆甜粥

其實係想整綠豆沙， 但係部機係冇咁嘅功能。 只係諗住試試。

材料 ： 綠豆 1 杯 ， 糯米 1/3 杯 ， 米 3/4 杯， 冰糖適量， 水 900ML （全部按跟機量杯）

今次用五殼功能， 但煮好後糯米及米比較痴底， 要用矽膠鏟攪拌將底的材料拌勻。  口感還是較粗， 要再鑽研一下。

淘 ～ 九陽豆漿機

其實呢個都唔算係我個新玩具， 因為我係想買嚟做母親節禮物。 我阿媽好鐘意食中式甜品。 尤其杏仁糊、花生糊、芝麻糊、合桃露等。 所以在 BK 看到 JM 們用這個都大讚， 所以淘了個平版回來。 不過， 自己要先試用， 免得佢拿手唔成勢嗰陣我又唔識教佢。

這個品牌是國內最出名的品牌。 很多 JM 都說飛利浦都是買他們的機掛自己名堂牌。 這個機可信性蠻高。 因為實在外型、功能都有點相同。  但飛利浦蠻貴， 所以我決定買 9 仔。 在網上對比了很多不同型號， 那些新款有立體環線加熱要成 800 人仔。 而我選擇是必須要有自動清洗及保溫。 還要考慮到容積、適用人數及功率。 自動清洗係唔想阿媽煩點洗， 雖然功效不大， 但有好過沒有。 保溫好明顯係要煮完都唔會攤凍啦。 容積及適用人數都考慮主因是有些機種 2﹣3 人， 有些 2﹣5 人及 4﹣5人。  所以唯有選擇較有彈性的 2﹣5人。 而功率有些是 750W 以下， 擔心不夠力打磨， 所以 750W 以下的不考慮。  而價錢亦是考慮範圍之一， 因為如果佢老人家唔 like 都有咁肉痛。

這台豆漿機分別可以以干豆／濕豆打磨成豆漿， 還可以打果汁及煮湯。 這些功能容後再試。 今日只試了米糊功能烹煮芝麻糊。

食材 ： 黑芝麻 30 G ＋白芝麻 30G ＋ 糯米 50G ＋ 白米 20G ＋ 糖 ＋ 水 1L

黑／白芝麻放到乾鍋內略炒。 然後跟其他材料倒入機內， 上蓋按“米糊”。 若 25 分鐘嗶聲响起加入砂糖拌勻即成。

成品白芝麻及部份米粒不夠糼細。 跟其他 JM 的比不算成功。 下次再試。

panasonic 麵包機 ～ 濃郁葡萄乾麵包

昨晚跟婆娘們晚飯， 按舊公司教主要求， 做了這款麵包給她。  但因天氣潮濕， 我已將原食譜 190G 的水減少至 170G 依然覺得麵糰過濕。 發得不太高。 其實如果昨日不是趕著出門就可以再減至 150﹣160G 然後再逐少加入。

原來夏天或天氣潮濕做包可不易呀。

新玩具 ～ 淘 ～山寨版 YoNaNAS 冰淇淋機

在 BK 那邊被毒了這台用新鮮水果制作成冰淇淋的雪糕機。 港版正貨剛出。 優惠價要 699 港元。 但自覺定價偏貴， 所以隨一些 JM 在淘寶找。  最平的 209 人仔有交易。 但有 JM 交易的是 299 人仔。 但礙於沒有評價而放棄了。 我這個賣家評分高， 而且分別提供美版、中版 ﹠ 歐版給選擇。 還要代換插頭。  但美版要拖牛， 所以不考慮。 中版要 488 人仔， 約 611 港元， 那跟買行貨平不了多少。  而這個賣家答應售價已包含用順豐直送我家的運費， 所以拍板買入歐版。  最初真的以為有歐版， 後來 JM 話歐版同是山寨版而已。 不過， 已經拍了。 聽天由命啦。

今早收貨了。 拆開紙皮箱， 內裡用泡泡紙包到成隻糉。

一睇說明書就知係山寨版了。 蒙查查。 如果正貨收我成七百蚊比這樣的說明書我， 真的要爆佢樽。

開箱後， 零件包括

壓料柱塞
料槽和葉版罩
葉版錐
膠圈
底蓋
主機

這台機主要靠這個錐形狗牙葉片來處理冰凍的水果。 所以售價超過 500 港元我個人都應為定價過高。

而主機就好似攪拌機原理， 將冰凍的水果塞進料糟， 用附有的壓料柱壓下就有天然美味的水果冰淇淋從前方出口吐出。  事實簡單、方便。 對小朋友較健康。 最少沒有添加劑。

試做了香蕉＋芒果＋乳酪。 口感當然沒有雪糕的滑及奶的香味。 而且成品帶點碎冰， 這可能是我加了乳酪冰粒的關係。

做法只需將水果去皮， 切件 （如香蕉一條分 3 段， 芒果開邊再一半）， 然後放入冰格冷藏 24 小時， 壓前放在室內回溫 10 ﹣ 20 分鐘。 視乎室溫。 然後就可以開機做了。

老實講， 500港元以內玩吓無妨。

攻城

星期一又收到兩打歐洲運來。 雖然個酒櫃還有點空間， 但其實只是我們將百佳買的放到旁邊的大電視櫃去。 很久以前買紅酒的小酒櫃原本壞了不打算送去維修， 現在也徵用起來。 所以還得送去維修。

小鬼 ～ 人細鬼大

 註 ： by 細魔

受到細魔 DNA 影响， 未夠 2 歲已經想同呢度打招呼。

小鬼 ～ 勞作

註 ： by 細魔

小鬼上學去後做了些小勞作回來。

小鬼舊照 ～ 剛學行

註 ： 舊照 by 細魔

依家不知走得幾快。(big grin)

又嚟 (*｀へ´*)

擒晚响書房反轉都搵唔到我包藥。 今次仲係醫生話要食晒成個療程的。 明明記得我早一晚食完入咗去一個有食藥水針筒連藥膏的舊藥袋然後放响電腦前要嚟提自己記住食藥。

擒晚醒起來的時候已經晚上十一點幾。 左搵右搵都唔見。 書枱櫃桶、電腦櫃的櫃桶仔、手袋、睡房、廁所、所有垃圾桶都搵唔到。  諗住自己眼大， 要搵嗰陣就鬼“up”眼。 於是進進出出幾次， 最後出埋去後梯垃圾房搵。 不過垃圾已經被收走。

無奈地返回家再找找看。 又無。 唯有死死氣去沖涼， 等第二天早上才向肥仔阿媽問下落。

沖完涼靈機一觸去藥箱睇睇。 果然， 又有人多手將我枱面上那包藥放進去。

我真係好想“鍋”鑊金佢。 真係唔知點解佢係都要攪吓人家的東西。  又唔係有鐘點嚟， 又唔係成枱嘢 （前晚我係得返包藥响枱面）。  話極都唔聽。 好想問佢係唔係我講佢聽唔明， 定係佢唔想明， 定係想挑戰我條底線(angry)


剛才走出廳時她在看報紙。 我再次請她以後不要幫我收拾枱上的東西。 我話我昨晚反轉整個房間也找不著我的藥。 於是她又解釋之前到藥箱取藥唔覺意將我包藥跟她的叠在一起， 所以一拼放入。 如果睇到唔會碰的。  接著我建議她為免下次有誤， 拿過一點點就不會容易搞錯了。 她繼續說是因為暈暈哋所以攪錯。   我話我比個建議你嚟減低攪錯機會。 跟住佢話你唔明我講咩。 我話我明呀， 所以我建議你拿過少少囉。 佢又重覆， 都係話我唔明。 我話夠了。 我要講的講完了。 唔再討論。

PanaSoniC 麵包機 ~ 日式烏冬 “附食譜及做法”

口感唔夠彈牙。 有些JM教落木薯粉， 不過屋企冇， 所以按住食譜整先。

擀完切條。 不過原來我切得太粗， 所以煮完變咗濶條烏冬。

小鬼舊照 ～ 刷牙仔

註 ： 舊照 by 細魔

雖然嗰陣時得幾隻牙仔， 但係愛妻號已經訓練佢刷牙仔。

鹹魚肉碎生菜絲炒飯

好似好耐冇整過炒飯， 所以今晚炒了一盆。

材料
白飯
肉碎
鹹魚
唐生菜
蛋

一碗份量豆腐花

一碗份量

材料:

豆漿 200ML

食用石膏粉 1/4 茶匙

粟粉 1/4 茶匙

凍滾水 2/4 湯匙

做法:  

1. 先將石膏粉及粟粉於入碗內用凍滾水拌勻備用。

2. 用另一個煲將豆漿煮滾, 然後以一尺高距離撞入 1） 中。  ＊＊ 記得撞之前再將石膏粟粉水攪勻先撞。

3. 蓋上已包乾布之蓋， 靜止15﹣20分鐘即可凝固。  (布的作用是用作吸去倒汗水)

4. 食前畢走表面泡沫後再分到小碗， 然後隨意加入適量黃糖／黑糖......＜＜原來加黑糖好好味㗎！

小鬼 ～ 囡囡 ﹠ PamPeRs 造型

 註 ： 舊照 by 細魔

小鬼父母經常戲弄他。 兩個造型， 你哋喜歡邊個造型多啲呢？

自從大酒櫃進駐後～

除了之前歐洲訂回來的， 百佳又買一堆回來。 最近又在網上選購了五箱回來。

小鬼 ～ THoMas 包包

星期六去打球前跟小鬼匆匆短聚。

其實是愛妻號在廈門的叔叔來港旅遊想買相機， 於是他們帶他到家樓下商場購買。 可讓我順便交個背包及牙刷給小鬼。

法式花藝 LeSSon 10 ～ Moss CovER SteM tEchNiQue

花材
1）BraSSica 葉牡丹
2）Rose 玫瑰
3）Dianthus 美女櫻
4）Asparagus 露筍草
5）Fresh Moss 鮮草皮
6）Dogwood 紅瑞木

做法
1）葉牡丹剪至適當長度在花泥中心點插入。
2）在葉牡丹葉與葉之間加入玫瑰。  莖要貼近葉牡丹之莖。
3）修剪露筍草至稍微疏散後加入。 同樣在葉牡丹之葉間。  莖要貼近葉牡丹之莖。
4）美女櫻作法跟露筍草相同。
5）將部份鮮草皮拉鬆後包在莖部上， 再用綠色圍繞繩固定。  餘下的舖在花泥面上。  剪數支綠鐵線屈成V形返轉插在草皮成泥上用作固定草皮。
6）將紅瑞木剪成相約的短支， 用草繩將數支合成一小札綁在鮮草皮外。 重覆做數札後在不同位置綁上。