有見及此，我就為她預備了一份"乘搭飛機流程" 的指引。 讓她可以安心地按步就班輕鬆搭機去。
除了出發指引外，回程指引同樣地給她準備好了。
出發前，肥仔再三叮囑她熟讀。 出發當天肥仔讓她發揮。 我們隨後。 但係佢一走入去第一個屏幕睇唔到。 直行直過。 之後找到了大堂中最大的一台屏幕後，抬頭看了良久又良久。 一臉茫然。 又轉頭走去問肥仔。 其實我都寫得好清楚。 搵唔到就問 information center 或工作人員。 肥仔無答佢。 叫佢自己諗辦法。
跟住佢又走返過嚟話重新開始。 終於搵到 check in counter，去到睇都唔睇就去排隊。 肥仔問，呢條一定係排你班機？ 佢先走去問。 我承認呢個步驟我寫少咗。 要寫埋排邊條隊先可以。
寄完行李拎埋 boarding pass 後，我哋又跟住佢走。 佢成日問肥仔係唔係"國內出發"？ 我真係火火哋。 我咪寫埋”國際、港澳台”囉。 比埋考試題目你你都係要讀範圍以外嘅嘢！ 肥仔叫佢拎張紙出嚟睇。 睇完佢都仲係死心不息問點解唔係國內.....我哋大家都唔答佢。 下次應該叫佢問國家或設計機場個負責人。
過 security check 特登離佢幾個身位。 等佢冇得問。 過關後就叫佢去閘口等。 上機後打比肥仔報告之餘問肥仔到香港後係咪要坐車出市區。 肥仔都火火哋 "阿媽，你香港住咁多年，去邊度唔使坐車㗎！？"
無人無物下佢咪自己去埋銅鑼灣間酒店 check in！
從香港回程，佢老問題又出現。 東張西望， 比晒佢要搵嘅嘢，但永遠你都覺得佢唔知望緊咩。 搵到 check in 區，又兩頭"鐘"。 但點都就係"鐘"唔到去"經濟艙"條隊。 身邊路過啲牌唔睇，身邊路過啲人唔問。 最後肥仔又走埋去帶佢。
取了 boarding pass 後我們讓她自己入閘。 我們再去 check in。
回到上海後雖然唔同機，但大家 land 嘅時間相差廿分鐘左右。 走到 immigration 前就見到佢。 我見應該有 e 道，所以就一起到那邊過關。 佢又問係咪用身份証。 大王呀！ 大陸嚟㗎！ 用咩身份証呀！？ 唉！ 我都冇咁好氣。 留比佢個仔。 我排去隔離條隊。 之後佢又問肥仔，張証向上定向下。 肥仔叫佢你睇吓前面啲人點擺啦。 唔好成日問。 第一，我哋都冇記住點擺。 今次咁擺唔得咪調轉擺囉。 第二，係想佢第日識得觀察人哋點做！ 唔好兩頭望等運到。
出閘後佢走埋我度話仲咩响佢後面唔話佢知點擺.....大王！ 寃枉呀！ 我排隔離，我自己都留意緊人哋點擺。 加埋我啱啱換完証第一次過 e 道，隨時要返去排人手。 鬼得閒睇住你咩。 仲要你個仔跟住你後面。
去到香港話個電話數據用唔到，去 smartone 問完人哋話佢一機兩咭，要將兩張咭調轉，我哋聽完先醒起。 於是佢又話"你哋冇同我講"。 佢真係天生咩都賴人！
沒有留言:
張貼留言