婆媳關係㷫到爆炸 の 鹹柑桔事件薄

上星期四（5 月 31 日）我 99 唔使返學之餘唔知點解唔使開壇睇住個市，於是又身痕走去做清潔。

點知比我响 cam 見到佢將大魔 07 年做給我的鹹柑桔連同我自己醃的拎晒出嚟搖呀搖。 跟住仲開蓋用筷子"撩呀撩"。  我都忍住唔彈出去。 但見到佢加熱水.....點算好.....用咩籍口現身呢？？？  因為依家我肥仔不在家時，我靠 cam 睇住，佢响度我就零露面。。。。自己躲在睡房中做隱仕。  猶豫咗一陣。 我都係要彈出去扮拎支水入廚房制止佢。  我入去見開晒蓋問佢"你仲咩幫我打開晒蓋？"，"佢話我見有兩粒無鹽蓋住"，我跟住伸手去上蓋摸到樽身熱。 我問"點解熱嘅？"。 佢話因為加熱水溶啲鹽"。

救命呀！！！  真係有冇人可以救吓我呀？！😡


於是我襟往自己度氣，我同佢講"我嘅嘢唔該唔好幫我整。 你可以抺嘢，但我嘅嘢麻煩你唔好搞"。  跟著住我就轉身去拎支水返入房。 不過佢都係聽唔入耳，又重複話見我有兩粒無蓋住。  隨即我就換衫去新屋。 因為如果我唔出去，佢又可能嚟拍我房門又重複佢個原因。

去到新屋我例行每日會發個短訊通知佢晚餐唔食，午餐佢自己安排。 廚房唔用。 因為如果做漏一次。 佢一見我就問今晚食唔食。 以前曾經佢自己同我講"唔使咁麻煩，你食先通知我。" 點知我一冇做，佢又嚟問。 咁我唯有日日例行公事咁做。  所以我就順便响個 msg 到話"柑桔浸得耐才有療效。  今次比佢一次過搞禍晒。  我再清晰地重申一次， 希望得到你老人家高度重視。   【我嘅嘢麻煩不要幫我作任何形式處理。 】麻煩你高抬貴手。 🙏🙏"

跟住你永遠唔會收一句"好的"。 佢又回覆我"柑桔是我見二粒突出鹽面幹哂，怪我多手，舊時我們這代經常整的，或許已落後，別怪。"

跟住同啲同學"嗔"完，同學話同醃鹹魚一樣道理。 唔夠鹽都係落鹽啦！  其實桔係都係加鹽蓋面。 之前我係見啲鹽擺住溶了頂上有兩粒沒蓋住，但諗住唔怕啦又無發霉。 費事開蓋增加接觸空氣啲風險所以我就由得嗰兩粒。

於是我唔抵得佢話佢嗰代經常整，我又覆佢"其實同醃鹹魚道理一樣。 唔夠鹽你會唔會用熱水嚟溶啲鹽繼續醃。 今次你唔使答我， 我幫你答"唔知。 因為你未試過"。 所以我只想清晰帶個訊息比你。 我嘅嘢唔好處理。 再次感謝。"。  這個 msg 後佢就唔回我。

點解我幫佢答？ 因為佢唔知嘅嘢係會答"我未試過"。 其實我同肥仔都努力過，盡量同佢食飯都傾吓計，肥仔就會諗一啲問題叫我哋估吓。 點知佢成日都話佢唔知、未試過。 死都唔估。 我哋都話話明估就梗係唔一定你知嘅嘢啦。 估又唔使錢、又唔使死。  但佢堅決話唔估。 加上有 cam 之後比我成日見到佢摷我啲嘢。 又人前人後兩個樣。 人前自己幾乾淨幾乾淨。 但比我見佢响鋅盆洗地拖。 "針"板放地面整合桃穿著施鞋踩上去跟住繼續整。  所以試過一排之後我哋慢慢變得食飯都變得鴉雀無聲。

嗰日我真係"谷"到情緒非常低落。 我自己一個人匿响新屋喊爆。 我家姐都無幾何整嘢比我。 我特登由香港帶到嚟上海。 搬嚟搬去我都帶住。 佢竟然走去幫我加熱水！！  我真係好嬲，但又無得對佢發洩。

肥仔返嚟我同佢講，新屋無論咩角落，只要擺我嘅嘢我就鎖！  跟住佢同我講叫我以後佢唔搞得嘅嘢貼張圓點紅 label。 佢會叫佢唔好搞。 我話你阿娘都講過，"你話我知咪得囉"。  而我都口講又講過、msg 又比過唔止一次。  一而再再而三同佢講都講過。 我話都唔知我係佢個女，定係你係佢個仔？  你好似唔多了解你自己阿媽。。。你覺得你貼張 label 佢會唔搞？  就好似有一晚肥仔食飯食到有鋼絲擦絲。  我諗吓我都好耐無用鋼絲擦.....加上洗菜嗰邊盆都唔會用嚟洗鍋。  原來佢阿媽自首話佢做清潔。 用鋼絲擦洗鋅盆。  肥仔問可唔可以唔好再用？  佢又嚟"乾淨啲唔好咩？"  咁肥仔話咁可以用第二啲。 不過佢阿媽依然嚟"唔用佢用咩洗？"。  於是肥仔自己嬲到即時行入廚房拎個鋼絲擦出垃圾房掉咗佢。 所以我話你覺得佢話得聽咩？  佢咪好似以前咁搞完扮無搞過擺返入去。 我話我到時如果見到更加"啞口食黃蓮"。 搵咩籍口彈出嚟？  我話面我就比足咁多年。 所以我會不留情面地鎖。

我仲問肥仔，點解情侣唔啱可以分手。 夫妻唔啱可以離婚。 佢又唔係我阿媽，點解我唔可以擺脫到佢。 我無奈地只換來他一句"對不起"。