第一次學人整乾鮑魚.....只因被迫。
其實一直無諗過學人整乾鮑魚。 因為知道工序多又唔識買。 而且現今罐頭鮑超方便。
之但係話說肥仔阿媽失驚無神買咗一堆"迷你"乾鮑返嚟。 跟手她取了部分煮.....但係工序只做了一半。 之後死都要我用我啲煲接手。 我已經話我未試過+你講到咁貴嚟碗拒。 但係佢堅持話"我都幫你整咗,點解你唔幫我煮埋佢"。 幾想講我無叫你幫我整, 我亦無打算整!
其實我最鬼討厭就係人家煮一半要我跟手。 加上未整過, 講到"好貴㗎!" 更加唔想攞嚟"較飛"。 再者唔想給她養成壞習。 鐘意鐘意就煮一半......
被迫下我唯有上網爬文。 免得問佢比佢借題發揮。
恰巧看到杜文澤在 FB 貼煮鮑魚文,之後再參考了討論區這篇文,又到 youtube 睇片。 但係用智能煲的就找不到了。 於是唯有 mix and match 自己由頭煮一次~
昨晚端上作為預祝她生日的菜式。
材料 :
迷你澳洲乾鮑 12 隻
老雞或雞 1 隻
肉排 (約 5 吋長)約 10 條
元貝 2 粒
雲南火腿 >> 家中沒有,所以冇加
急凍海參
浸發方法:
將乾鮑沖淨放入保溫杯中,加入剛煲滾的滾水上蓋。 早/晚將水倒出,煮滾後倒回入保溫杯中。 如是者重覆 3 天。 將焗完水的鮑魚拿出, 用廚剪剪去魚咀部位。
**若大量的可改用真空煲或燜煲。
煮腍(智能煲)及炆煮 (Stuab) 方法 :
1) 將雞洗淨開邊、將肉排砌件汆水備用。
2) 將烚過的竹墊放入內鍋底, 將雞脾位向鍋底放。 將已處理的鮑魚放在兩邊雞的體內。 再鋪上排骨、已浸發的元貝和火腿(如有)。
3) 倒入清水(雞湯)和鮑魚水。
4) 加蓋後用自選儲氣程式,時間為 65 mins。 程序完成後讓其自動解壓兼放涼才開蓋。 開蓋後主要是將雞湯上的油去走。
5) 再將 4) 重覆一次。
6) 食前先預將急凍海參解凍後去除內臟洗淨後以薑蔥汆水備用。
7) 程序 5) 完成後將鮑魚及部份湯汁(去油後過篩)和海參放入 stuab 鍋中以中火加熱餚煮。 其間加入蠔油及少量冰糖調味,再加少許老抽調色。 食材跟汁料拌勻後加蓋以勁細火炆煮 30 分鐘。 其間小心痴底。 開蓋後以生粉水埋獻。
8) 另取 stuab 蜂巢鍋將生菜蒸煮,然後將 7) 淋上即成。
咁你以後多一道拿手菜了
回覆刪除哈哈~ 係㗎::_1554
刪除