九陽電飯煲 の 又一懶人餸 ～ 滷蹄膀

31 Oct 2014

好耐無出食譜 post 喇。 嚟到終於有個大作。

是晚陳公館宴請兩位老馬到來晚飯。 架撐雖然未到，但係多得這個萬能飯煲幫一把。 中午先用飯煲滷下這隻蹄膀後就跟空姐去 tea。

回來加入焯過的小唐菜即成。  友人大讚好入味，又 Q。 不會過腍。



參考食譜 ： 穆桂英-滷蹄膀

食材 ：
蹄膀
蒜頭
薑
蔥 （去附根部整條／束放入）
芫荽
小唐菜

調味 ：
生抽
老抽
冰糖
紹酒
滷包
香葉 （bay leave)

做法
1）蹄膀解凍後洗淨嗦乾水。  再用火鎗燒毛（我無火鎗，所以開火直接燒吓個表皮啲毛。 點知搞到警報響.....好彩我熄火後佢 detect 到無熱／火就唔響，唔係實招上嚟真係核突死）。
2）將燒毛後的蹄膀用加了紹酒、薑、蔥的熱水汆水， 洗去淨出來的髒物後用冰水冰鎮後備用。
3）飯煲內鍋中加少許油將薑片和蒜頭用標準功能加熱爆香。 然後放入蹄膀（蹄膀瘦肉朝下，再加入水、生抽、老抽、冰糖、酒、滷包和香葉浸至蹄膀 2/3 後按取消。  上蓋後改用蒸功能。 時間調至 40 分鐘左右。  完成後將蹄膀的肥肉朝下浸在湯汁中，再上蓋後用蒸功能。 時間調至 40 分鐘左右。  完成後留在煲內焗 2 小時左右 。
4）滷好後放入浸暖的盤子。 然後排入焯過的小唐菜，再灑上芫荽作裝飾即成。


同場加映 ：番茄滑蛋蝦仁