1 Jan 2011
今日坐七點幾機, 天未亮, 眼未開就要出門. 早一晚肥仔諗住 call 定的士, 點知個台著佢第二朝再 call。
大中招!!! 兩個台都 call 極都冇人聽, 最後我在網上找到一間 Limousine。 好在有人聽。 如果唔係真係唔知點算!
一小時左右機程, 八點半左右就到了, 先去取車。
架車比我想像中簡陋。 原本係架標緻 107 或同級, 但係呢架 fiat 真係唔可以話同級囉! 連倒後鏡都要手動。
憑住導航話咁快就入到市中心。 先找找 tourist information。 當然冇開門啦! 一月一喎! 搵鬼做嘢咩!
酒店又冇咁早可以 chcek in, 所以唯有開車週圍兜兜。 車停在這裡去旁邊的 Esplanade des Quinconces。
亂咁兜先去到 Esplanade des Quinconces。 今日仲好大霧添。
車駛到市中心找到泊車位, 決定停下車去購物大道走走。 沒有店舖開。
見到 LV 大門被打爆, 而門前的私家車連司機一直都停在店門前沒有離開。
既然無咩睇, 就去 Le Regent 坐坐, 飲杯咖啡, 食個包。 飲咖啡送麵包， 每杯兩個包兩塊牛油.......但係兩塊牛油收 €1.9 (abt hkd21).....（−＿−；）
暖身後往 Cathedrale st-Andre 方向走去。
教堂旁邊臨時搭建了一個戶外溜冰場。
歐洲教堂每個都有自己獨特風格。
Hotel de Ville 亦是在教堂旁。
有藍天真係影咩都靚。
大教堂旁聳立著引人注目的塔 ~ tour pey berland。
市內有給遊人自由租用的單車。
走到 Place Sanit Projet。
地上有塊鐵片介紹.....不過睇佢唔明......因為全部法文。
冇咩睇所以諗住去 check in。 今次肥仔租 Citadines Centre Meriadeck Bordeaux。 係 service apartment 的 studio type。 貪佢有個廚房仔可以煲吓水。 因為大部份歐洲酒店都係唔提供熱水壺。
但係去到 receiption 竟然無人......諗吓, 死啦! 唔通一月一冇人返工!!! 窗口貼住有個緊急電話號碼的紙.....但係打又冇人聽。 問路過的住客又話唔知。 不過, 我 check 返我個 booking confirmation 寫住 0800-1200 & 1400-2000hrs。 等了半小時, 到了兩點, 終於有人返。
入到去, 原來係瞓梳化床, 唔怪得之咁平啦!!! 三晚房租才 163 歐羅。 不過, 張梳化床又估唔到咁 OK 喎!
一齊安頓後又出門去
去咗河O既另一邊個廣場 ~ Stalingrad。
地標之一 ~ Port De Pierre。
The Great Bell 喺條小街.....唔覺意, 真係會 miss 咗。
離開去了火車站附近兜兜。
兜兜吓眼前一"叮".....有間藥房開門營業, 肥仔可以去買咳藥水了!!! 由於手提行李限制, 所以冇從瑞士帶過嚟!!
之後停車在 Basilique Saint-michel 教堂附近去河邊走走。
但係太大霧了! 蒙矓一片!
將近傍晚六點返到去購物大道, 人多了。
晚上亮了燈的 Cinemas 都好靚。
macarons 我覺得好貴.....成 1.3 歐羅一件......究竟香港賣幾錢呢?
另一間糖果店, 除了 macarons 還有很多不同造型的朱古力公仔。
朱古力旁就是 Regent。
Regent 對面就係 Theatre。
Les Alees de Touny 有 265 米長的小街。 旁邊都是十九世紀的建築物。 聖誕節及新年前搭建了小木屋作小賣店。 不過, 一月一這天當然十室九關啦!
這 eglise Notre-Dame 教堂已於 1908 年被評定為世界文化遺產。
教堂右邊的街太靜了, 所以我們折返去大路找餐廳醫肚。 時間才不過六點半左右.....不過唔食真係冇咩好做....費事返酒店又再出嚟。
這店是下午經過時心儀的餐廳 ~ Le Bistrot Regent 。 不過門口的餐單實在睇唔明。 還未開門營業呢! 不過肥仔見有店員, 硬著頭皮走入去問幾點開門。 店員很友善, 話約十五分鐘後, 但可以讓我們先進來。
不懂英語的待應很落力為我們講解.....大家都用上身體語言, 介紹鷄時, 待應扮鷄拍翼....到點飲料時, 我們說紅酒.....但係佢唔明白。 最後我指著指甲上的紅色他就明白了。 哈哈....佢真係好好人。
原來他們只有三款菜式, 鷄、魚、牛。 而三款都係用同一款醬汁。 每 set 都另配有沙律菜、薯條及甜品。 雖然同一款醬汁, 但係好好味! 最重要係唔會太多。 環境好、服務又一流, 仲要係 50 元左右歐羅連餐連紅酒! 真係抵!!!
沒有留言:
張貼留言