涼瓜炒牛肉

肥仔阿媽睇唔過眼佢買件涼瓜擺咁耐都未輪到佢出場。 於是出招幫我切好晒兼汆埋水擺响度睇你用唔用....哈哈～

既然佢咁擔憂，我就用打邊爐淨返的牛肉嚟煮咗，幫佢分憂啦。

材料 ：
涼瓜
手切肥牛
蒜頭/豆豉（弄碎）



做法 ：
1）涼瓜洗淨去囊切薄片，用鹽醃一醃。
2）燒一鍋水， 加鹽放入涼瓜汆水後用凍水過冷河。  瀝乾備用。
3）牛肉切片，用生抽、少許蠔油、糖、紹酒、麻油和生油來醃最少 15 分鐘。 下鑊炒前逐少逐少加水至牛肉輕身（變海棉狀）。
4）熱鑊下油至出煙，下牛肉快炒至表面轉色後盛起備用。
5）原鑊下油以中火炒香蒜頭、豆豉。  加入涼瓜炒勻。 再加入牛肉炒勻即可上碟。