StaUB ~ 簡易版生炒糯米飯

上海這邊氣溫一直徊回在幾度左右，咁鬼凍就諗起生炒糯米飯。 一直都好想挑戰這個菜式，但一聽到炒成粒鐘，炒到手都軟，而且成功率參半，所以就沒有行動了。

最近留意到坊間出了不少簡易版，看罷還是沒有太大信心。 於是上 youtube 看了好幾條片子。  其中有 LC 的，雖然炒完頭料起計炒 8 － 10 分鐘就得，但我怕鑄鐵鍋火路控制得不好就會好似燶。  但又好想用 staub 去煮，所以選了另一條短片。  炒完頭料鋪平後將浸過的糯米鋪上略蒸再炒。 好易做。

出來效果很好，雖未至粒粒分明，但總算口感上都合格！



參考做法 ： youtube ～ 簡易生炒糯米飯

材料：
糯米 1 電飯煲木杯 多少少
臘腸 1 條
膶腸 1 條
瑤柱 1 粒
細冬菇 6 隻
蔥粒
水

做法：
1）糯米用水浸 4 小時瀝乾水份備用。
2）臘腸、膶腸用熱水拖拖去油切粒備用。 冬菇用熱水浸軟後切粒備用。 瑤柱蒸熟或用水浸軟後用手撕開成幼絲備用。 浸瑤柱的水留用。
3）staub 中細火加熱，下臘腸和膶腸粒慢炒至出油份後熄火鋪平，灑上冬菇粒和瑤柱絲。  再鋪上糯米。 注入可蓋過食材 2/3 的清水和瑤柱水後撒少許鹽上蓋。  開中細火加熱至出煙後轉細火煮 10 分鐘。
4）開蓋後開將所有材料和糯米前後左右推勻。 乾身後撥開一小空間下 1 － 2 湯匙水繼續推。 不斷將糯米推散，重覆這動作約 8 － 10 分鐘或至糯米熟透即可加少許紹酒和老抽拌勻（若不夠味可加甜豉油）。 最後熄火拌入蔥粒即成。