睇嚟 MaMiROboT 得到肥仔阿媽認同 \(^o^)/

上次啱啱用肥仔阿媽問我“咁我點知佢邊度吸咗， 邊度抺咗呀？  啲角佢咪吸唔到囉？“  我索性叫佢”你跟住佢咪知佢邊度做咗囉！  佢冇做嗰度你咪跟住佢抺囉！“ 。 跟住又話唔用嗰陣唔好插電， 用先叉電， 我話”咁啫用親都要等佢再叉電先用得？！  咁咩叫隨時可以用呀？“  有陣時真係要咁對佢。



講開叉電就諗起以前我將個上網 modem、wifi、電腦插响可以熄電制嘅地方， 有時夜晚我比部機 overnight load 嘢， 又或者入房瞓之前上網， 但係成上上吓斷線又或者發現部腦熄咗， 因為肥仔阿媽成Q日失驚無神走去幫我熄制。 同佢講幾萬次都係要熄咗佢。 後來火火哋將所有線駁去隱藏線位， 要抬機先可以抽堆制出嚟熄。 佢有次問我係唔係驚佢熄我啲制...我都費事再講。 話”唔係“就算了。

不過， 見佢上星期四將自己房張櫈、坐地風扇搬出嚟， 然後捉咗 robot 入房吸。  跟住星期五清潔姐姐嚟， 之後兩日我都出咗去。 所以其實我冇用過， 但係掀開塵盒好大舊塵。 睇嚟肥仔阿媽都有捉佢出嚟返工， 而且幾滿意。 如果唔係佢唔會掂， 仲要搬開支地燈比個位佢坐正。  唔係佢日日用邊得嚟咁多塵。  擒晚仲聽到佢成日拎個手提吸塵器吸。