RaSonIC 智能煲 ～ 韓式炆牛肋條

其實算唔算韓式呢？  因為我冇粟子， 又無白蘿蔔， 反而落咗粟米。 重要唔係牛肋骨係牛肋條.....不過， 是旦啦。 志在搵屋企有咩可以用個智能煲試煮。

淨係個煲煮嘅時間約 1 小時。  相比上次用 staub 明火少了 1 小時。  最重要係唔使睇火， 又唔使驚痴底。

材料
急凍牛肋條 約1Lb
紅蘿蔔 1 個 （大）
粟米 1 條
紅棗 5 粒 （要有核）
梨 1 個
韓式肉汁醬 1 瓶
薑片 3 ﹣ 4 片 （我落咗好多片）
蒜頭 10 粒

做法
1）牛肋條溶雪後切粒再飛水。 飛水即係滾水放下去， 1 分鐘左右撈起隔水。
2）蘿蔔、粟米切件。
3）梨去皮用攪拌機打成茸。
4）紅棗洗淨
5）智能煲選擇“加熱”功能， 將時間設定為 10 分鐘。

4）2 分鐘後下油， 爆香薑片蒜頭， 再落牛肋條粒略炒。  再加入紅蘿蔔、粟米、紅棗、梨茸、韓式醬後再加水至食材一半， 拌勻後按“取消”。

5）用蓋蓋好, 按“筋腩”功能，待轉保溫狀態及浮子閥落下， 在排氣口放上濕布後將排氣口轉動去”放氣“來確保煲內完全減壓後才開蓋。  完成後即可享用。

評 ：
開蓋後試食牛肋條粒軟軔度剛好。 不過智能煲落少咗水， 所以今次落 1 瓶韓式肉汁醬太濃， 下次落半瓶或 1／3 好了。